LAOAG CITY – Inpakaammo ni Atty. Donato Balderas Jr., Schools Division Superintendent ti Department of Education – Ilocos Norte a manamnama nga adda ti agarup innem a ribu a mangisursuro ken non-teaching personnel ti makipaset iti pannakarambak ti World Teachers’ Day inton Oktubre 10 iti Ilocos Norte Centennial Arena.
Segun kenkuana, daytoy a naisangsangayan a programa ket kas panangsaludar kadagiti amin a mangisursuro manipud iti pampubliko wenno pribado a pagadalan iti intero a probinsia.
Inbatadna a maipaayan ti pammadayaw dagiti maibilang nga Outstanding Teachers a nangipakita ti naidumduma a talento a nagbalin nga inspirasion dagiti estudiante.
Inlawlawagna nga adda dagiti inimbitaranda a Board of Judges nga isu ti nangarasit ken nangtingiting a naimbag dagiti maseknan a napili a finalist ti Outstanding Teachers.
Kunana a dagiti kangrunaan a sangaili iti maiyuswat a naindaklan a programa ket da Gov. Matthew Marcos Manotoc, Vice Gov. Cecilia Araneta Marcos, Ilocos Norte 1st District Rep. Sandro Marcos idinto a ni Ilocos Norte 2nd District Rep. Angelo Marcos Barba ti agserbi kas Guest of Honor and Speaker.
Innayonna a babaen iti nasao a programa ket maikkan dagiti mangisursuro ti pammigbig gapu iti sakripisio ken kontribusionda iti komunidad.
Kabayatanna, naammoan a kageddan iti pannakaselebrar ti World Teachers’ Day ket maselebraran pay ti maika-122nd Foundation Anniversary ti Schools Division of Ilocos Norte.
