LAOAG CITY – Nangilatang ti gobierno ti sumurok-kumurang P1.30 trilyon para iti panagpadur-as ti sektor ti edukasion ita a tawen.
Daytoy ti inrakurak ni Presidente Ferdinand Marcos Jr. iti panagbitlana iti maika-3rd Commencement Exercises ti West Visayas State University (WVSU) College of Law no sadinno nga inpettengna a napateg ti agtultuloy a panagpuunan iti edukasion tapno ad-adda pay a mapapigsa ti sistema ti hustisia ken panagdur-as ti pagilian.
Kagiddan ti okasion, indauloan ti Presidente, kaduana ni First Lady Louise Araneta-Marcos ti pannakairubuat iti baro nga uppat a kadsaaran a pasdek ti WVSU College of Law nga adda ti innem a classroom, review room ken dua a moot court kas paset ti panagpuunan kadagiti sumaruno nga abugado.
Immunan nga inrakurak ti Presidente a ti nailian a pundo para iti 2026 ket nangilatang ti kadakkelan a pundo iti pakasaritaan para iti edukasion nga umab-abot iti P1.345 trilyon wenno 4.36% ti Gross Domestic Product (GDP).
Naammoan nga usaren ti pundo iti panangala kadagiti mangisursuro, learning recovery kadagiti kangrunaan nga asignatura, school-based feeding programs ken panangipasdek kadagiti classroom iti pagilian.
