LAOAG CITY – Inbatad ti Department of Social Welfare and Development (DSWD) a nasuruken a 2.3 milyon ti balor ti humanitarian assistance ti naibunong ti ahensya kadagiti pamilya ken indibidwal a dinuprak ti bagyo Kristine.
Basar ken ni Disaster Response Management Group (DRMG) ken Spokesperson Assistant Secretary Irene Dumlao, dagiti kangrunaan a probinsya a naipaayan ti tulong ket iti Albay, Camarines Sur, ken Sorsogon iti Bicol Region; Bacolod City iti Region 6 (Western Visayas); ken North Cotabato iti SOCCSKSARGEN.
Mainaig iti daytoy, inpakaammo ti Department of Social Welfare nga agtultuloy ti ar-aramiden a repacking dagiti volunteers iti National Resource Operations Center (NROC) iti Pasay City tapno masigurado nga umdas dagiti family food packs (FFPs) a kasapulan a maiwaras kadagiti lugar nga apektado ti bagyo.
Kabayatanna, basar iti kaudian a report ti Department of Social Welfare-Disaster Response Operations Management, Information and Communication (DROMIC), addan ti 112,437 a pamilya wenno 457,489 nga indibidual manipod iti 815 a barangay iti Region 2, MIMAROPA, region 5, 6, 8,12 ken Bangsamoro Autonomous Region in Muslim Mindanao (BARMM) ti nairekord nga apektado ti bagyo Kristine.
Agpapada met a nakadeploy ti Quick Response Teams (QRTs) ken Municipal Action Teams (MAT) ti Department of Social Welfare – Field Offices kadagiti apektado a lugar tapno asistiran ti local government units (LGUs) iti dadduma pay a pagkasapulan dagiti adda kadagiti evacuation centers.
