LAOAG CITY – Inadmitir ti Philippine Statistics Authority (PSA) a kurang ti balor a P63.87 a badget iti taraon ti maysa a tao iti kada aldaw.
Daytoy ket segun ken ni Philippine Statistics Authority Head Claire Dennis Mapa ti rason no apay a tingitingenda a naimbag ti methodology para iti panangarisit iti poverty ken food thresholds inton sumaruno a tawen.
Iti datos ti Philippine Statistics Authority, ti food threshold ti maysa a pamilia nga addaan ti lima a tattao ket ngimmato iti 14.7 percent wenno dumanon iti P9,581 iti kada bulan iti napalabas a tawen wenno agarup a P64 iti kada maysa a tao iti maysa nga aldaw a taraon ngem nangatngato met daytoy iti P8,353 iti kada bulan idi 2021.
Nupay kasta, inbatad ni Mapa a ti maysa a tao ket saan a maikonsiderar a kurang iti taraon wenno food poor no daytoy ket addaan ti badyet a nasurok P63.87 iti kada aldaw wenno P21.30 iti kada meal.
Iti national level, daytoy ket mangipasimudaag a ti pammigat ket maysa nga scrambled egg, kape ken inapoy idinto ti pangaldaw ket maysa a mangkok ti balatong nga adda ti bulongna ti marunggay, prito a dilis, maysa a saba ken inapoy ken iti merienda ket pandesal.
