LAOAG CITY – Indauloan ni Gob. Matthew Marcos Manotoc ti pannakaipaay ti sueldo dagiti nagbalin a benepisiario iti umuna a bansada ti Summer Tourism Operations and Employment Program ita a tawen 2024.
Segun iti gobernador 159 dagiti immawat ti sueldoda ita nga aldaw.
Imbatad ti Gobernador nga immawat ti tunggal maysa iti 8,700 a pisos para iti panagserbi dagiti benepisiario iti uneg ti duapulo nga aldaw a kaibatugan ti pannakaipaay ti nasursuruk ngem maysa a milyon a pisos a sueldo dagiti nagserbi a tourism ambassador.
Inlawlawagna a kangrunaan a gagem ti pannakaitultuloy ti nasao a programa ket tapno masigurado nga agtalinaed iti lagip dagiti turista ti kinapintas ti probinsia ngem agbalin a napateg kadakuada gapu iti napintas nga imahe dagiti residente babaen kadagiti nagserbi a tourism ambassador.
Mamati ni Gob. Marcos Manotoc a naragsak dagiti turista iti panagpasiarda ditoy probinsia iti tulong ti nasao a programa nga inrubuat ni Senador Imee Marcos idi isu pay laeng ti gobernadora ti probinsia.
Impadanonna ti panangnamnamana nga agtultuloy ti pannakikammayet dagiti benepisiario kadagiti nagduduma a programa ti probinsia para iti ad-adda pay a pannakaipadur-as ti turismo ditoy Ilocos Norte.
