LAOAG CITY – Dumanon iti siam a bilyon a pisos ti balor dagiti 628 a proyekto imprastraktura nga ipatungpal ti Department of Public Works and Highways – First District Engineering Office ita a tawen.
Segun ken ni Engr. Glen Miguel, District Engineer ti Department of Public Works and Highways – First District Engineering Office, dagiti nasao a proyekto ket ti pannakaipasdek ti multi-purpose building, rangtay ken kalsada.
Inbatadna a kadakkelan a nailatangan ti pundo ket ditoy siudad ti Laoag kadagupan kadagiti 12 nga ili iti umuna a distrito ti probinsia.
Inlawlawagna a malaksid iti nailatang a pundo manipud iti opisinada ket sabali pay ti pundo a mausar para kadagiti proyekto manipud iti regional office.
Innayonna nga ad-adu dagiti maipatungpal ita a proyekto imprastraktura maidasig iti napalabas a tawen nga adda laeng ti sumurok 400.
