LAOAG CITY – Manamnama ti pannakairugi ti Palarong Pamasko ditoy ciudad ti Laoag inton bigat, Oktubre 30.
Daytoy ti inpakaammu ni Mr. Hipolito Salva ti Sports coordinator ditoy ciudad ti Laoag.
Segun ken Salva, naminduan a daras a naitantan ti aktibidad gapu kadagiti simmangbay a bagyo ditoy probinsya.
Kunana nga iti barangay level ket adda 54 a team ken 76 a barangay a makipagpartisipar, idinto nga iti agency level ket adda 40 a team agraman ti inter-office ken inter-department ken iti volleyball ti agency ket adda 27 iti male category ken 10 iti female category.
Masayangan met ni Salva ta adda latta dagiti barangay a saan a nakisalip gapu ta posible a saan da a makabukel ti team da.
Innayonna nga apaman ti closing ceremony ket addan tu maawat dagiti mapagasatan a mangabak kadagiti nagduduma nga ay-ayam a cash prizes, trophies ken medalya.
Kabayatanna, mabalin nga umabot agingga Disiembre sakbay ti Christmas break ti Palarong Pamasko.
