LAOAG CITY – Nagballigi dagiti otoridad iti insayangkat da a search warrant operation iti maysa a pagtaengan iti Barangay 27 ditoy ciudad ti Laoag.
Nabigbig ti subject ti operasyon a ni Junvert Padaca y Palting, agtawen ti 33, dealer ti salted egg ken residente iti nadakamat a barangay.
Ti search warrant ket aggapo iti RTC Branch 12 ditoy ciudad ti Laoag gapu iti panagsalungasing ti Republic Act (RA) 9516 wenno illegal possession of explosives.
Nakumpiskar dagiti otoridad ti maysa a granada ken maysa nga homemade caliber 22 nga addaan ti tallo iti kabinet ti subject idinto a ti maysa a riffle grenade ken 20mm a bala ket naala met iti sofa da.
Iti interview ti Bombo Radyo Laoag ken ni Padaca, inbaga na nga inwayatan da ti operasyon gapu ta maipagarop nga adda ti ik-ikutan na a granada ken paltog.
Nupay kasta, inpasingked ni Padaca nga awan ti ik-ikutan na a paltog, granada, ken awan pay pulos ti nakairamramanan na a krimen, kasta met nga awan ti nakarirriri na ken rekord na a madi iti barangay da.
Innayon na a kabayatan ti panagdigdigus na ket adda ti nakita na, uray dagiti kakabsat na nga immuli a maysa a tao iti balay da ken adda ti inpurwak na a banag iti maysa a pulis nga adda iti baba.
Inpetteng na a dagiti naala nga ebidensya iti uneg ti pagtaengan da ket naimula.
Kastoy met ti inpetteng ti ina ti subject ti operasyon a ni Mrs. Mary Anne Padaca gapu ta maipagarop a kellaat lattan nga adda ti tallo a pulis nga immuna a napan iti maikadwa a kadsaaran ti balay da.
Kuna na nga immuna a bimmaba ti maysa a pulis idinto dagiti dua ket nagbayag da iti ngato sakbay a bimmaba dagitoy.
Inpataged pay ti ina a Padaca a sakbay ti operasyon ket nagdaldalos da ken sinukatan da ti bedsheet da, ken awan ti nakita da nga aniaman a bala wenno paltog isut gapuna a patienna a naimula amin dagiti ebidensya a naala dagiti otoridad iti uneg ti balay da.
