LAOAG CITY – Inpetteng ti Philippine Air Force (PAF) a nagtalinaed a normal ti situasion iti Villamor Air Base idiay Pasay City.
Daytoy ket iti baet dagiti sayangguseng nga adda ti maipagarup nga agur-uray nga eroplano iti nasao a lugar tapno mangitulod ken ni Senador Bato Dela Rosa idiay The Hague, Netherlands.
Inbatad ni Philippine Air Force Spokesperson, Col. Ma. Christina Basco nga awan ti na-monitor-da a naidumduma a garaw kadagiti eroplano iti nasao a Base Militar para iti gagem a tignay.
Nadakamat a ginandat nga iserbi ni dati a Sen. Antonio Trillanes IV kadua ti National Bureau of Investigation (NBI) ti warrant of arrest ti International Criminal Court (ICC) kontra ken ni Sen. Ronald “Bato” Dela Rosa kabayatan nga adda daytoy iti senado.
