LAOAG CITY – Inlawlawag ti dati a mahistrado nga umdasen ti 15 a botos dagiti senador-judge tapno ma-impeach ni Vice President Sara Duterte no ibilang a pugante ni Senador Ronald dela Rosa.
Segun ken ni dati a Supreme Court Associate Justice Adolfo Azcuna, uray saanen a palubusan dagiti senador a makipaset iti impeachment trial intono Hulyo 6, karaman da paylaeng a mabilang ti botos na kas mandato ti konstitusyon a two-thirds wenno 16 a botos tapno makunviktaran ti Bise Presidente.
Nupay kasta, inkalintegan ni dati a Justice Azcuna a mabalin a ma-exempt ni Dela Rosa manipod iti nasao a bilang no maibilang daytoy a maysa a pugante, a katukad ti “constructive resignation.”
Iti agdama ket aglemlemmeng ni dela Rosa kalpasan a naisyu ti arrest warrant nga inparuk-at ti International Criminal Court (ICC) kontra kenkuana.
Immunan a nainaganan ni dela Rosa kas maysa kadagiti maipagarop a co-perpetrators ni dati a Presidente Rodrigo Duterte iti kaso a crimes against humanity gapu iti maipagarop a rinibo a tattao a napapatay iti babaen ti war on drugs ti dati nga administrasyon.
