LAOAG CITY – Positibo ti naiyuswat a search warrant operation iti Barangay 51-B, Nangalisan ditoy ciudad ti Laoag.
Nabigbig ti subject ket ni Mr. Reynaldo Requilman Tomeldan, agtawen ti 65 ken residente iti nasao a lugar.
Naala dagiti otoridad iti uneg ti pagtaengan ti maysa a caliber 22 magnum, walo a pidaso ti bala ti nasao a paltog a naala iti altar ken maysa 12 gauge shotgun a loaded ti uppat a bala a naala met iti cabinet iti kwarto ti asawa ti subject, ken tallo a bala na a naikabil iti maysa a supot iti babaen ti cabinet.
Nakailanad iti search warrant a ti biruken dagiti otoridad ket maysa a caliber 38 revolver ken bala na, ken awan ti lisensya dagitoy.
Mainaig iti daytoy, kuna ni Tomeldan a a ti naala a caliber 22 a paltog ket saan na a kukua no diket kukua a mismo ti agtagikua iti balay, idinto a ti shotgun ket kukua ti asawa na.
Segun kenni Tomeldan, caretaker da laeng nga agsawa iti pagtaengan ken kukua ti Norma Geronimo, kabsat ti asawa na.
Inbatad na a ti shotgun ket adda ti dokumento na.
Kabayatanna, kuna ni Police Lt. Col. Rafael Lero, chief of police ti PNP-Laoag nga inyuswat da ti operasyon gapo ta basar iti intelligence report ket maipagarop a pagkarkarit ni Tomeldan ken ilaslastog na ti paltog na.
Kuna ni Lero a daytoy ti ummuna a gundaway a naiyuswatan ti operasyon ni Tomeldan.
Innayon na a ni Tomeldan ket datin a nakaswan ti iligal a droga partikular ti dati a linteg pakaseknan ti iligal a droga wenno ti RA 6425.
Manamnama met a sumango ti panaglabsing iti RA 10591 ni Tomeldan.
