LAOAG CITY – Maysa a pamilia idiay Minnesota, U.S.A ti nakagun-od ti world record gapu ta amin a kameng ti pamilia ket natatayag.
Kinumpirmaran ti records keeping organization a Guinness World Records a ti Trapp Family ti Esko, Minnesota ti record holder ti titulo a “Tallest Family in the World” gapu iti average height-da a 6 feet and 8 inches.
Ti katayagan iti pamilia Trapp ket ti buridekda a ni Adam nga addaan ti height a 7 feet 3 inches. Maikadua ni Savannah ken maikatlo ti amada a ni Scott nga agpada nga addaan ti height 6 feet 8 inches.
Simmaruno ni Molly a 6 feet 6 inches ken ti kabassitan ket ti ina ti pagtaengan a ni Krissy a 6 feet 3 inches ti height-na.
No pagtitiponen ti height-da, dumanon daytoyen iti kaatiddug ti maysa a tennis court.
