LAOAG CITY – Ipawil ti Civil Service Commission (CSC) dagiti opisial ken empleado ti gobierno a makipaset kadagiti partisan political activity kas ti panag-like, share ken dadduma pay a kapada nga aktibidad iti social media iti panawen ti panagkampania para iti 2025 National and Local Elections.
Iti Memorandum Circular 3-2025, nadakamat iti 1987 Konstitusion ken dadduma pay a maipatpatungpal a linteg kas pangibasaran.
Nailanad ditoy nga awan ti opisial wennoo empleado iti serbisio sibil ti mabalin a makipaset, direkta man wenno saan, iti aniaman a kampania wenno partisan nga aktibidad iti pulitika ken awan ti kadua ti militar a mabalin a makipaset, direkta man wenno saan, iti aniaman a partidista nga aktibidad iti pulitika, malaksid laengen iti panagbutos.
Kabayatanna, ti pannakaipawil ket saan laeng nga iti oras ti trabaho no di ket uray nalpasen ti trabaho iti panawen ti kampania uray iti ruar ti opisina dagti opisial ken empleado ti gobierno.
