LAOAG CITY – Inbatad ni Bombo International News Correspondent Mr. Joe Mateo Antes iti Las Vegas, Nevada a nangrugin ti panagbutos da para iti baro a presidente ti Estados Unidos idi Biyernes.
Nu pay kasta, kuna na a daytoy ti umuna a gundaway a babaen ti mailing ballot ti panagbutos na.
Mainaig iti daytoy, inbatad na a naiget ti laban iti nagbaetan ni Donald Trump kenni Joe Biden iti estado da.
Innnayun na nga iti baet ti mapaspasaran a pandemiya ket nagtalinaed a naannayas ti panagbutos gapu kadagiti mailing ballot nu sadino a maliklikan ti panagdudupod.
Kuna na a saan nga agamak nga adda ti maaramat a panagswitik gapu ta naiget ti maipapaay a seguridad iti lugar.
Iti sabali a bangir, inpakaamo na a malimitaran pay laeng dagiti business establishments nga agoperar ken naiget a masursurot ti social distancing ken pangisuot ti face mask kas addang tapno maliklikan ti panagwaras ti coronavirus.
Kabayatanna, manamnama a maamoan ti baro a madutukan a presidente iti Estados Unidos intuno Nobiembre 3 ita a tawen.
