LAOAG CITY – Saan pay a maipalubos ti panaglubbon iti motorsiklo iti ciudad ti Batac.
Daytoy ti inpakaammo ni Mayor Albert Chua iti nasao a ciudad.
Segun kenni Chua, daytoy ket gapu ta awan pay ti written document a naawat na manipod iti Gobierno Probinsial ti Ilocos Norte a mangibaga nga ipalubusen ti Inter-Agency Task Force ti panagkalubbon iti motorsiklo.
Gapu iti daytoy, ginutigot ni Mayor Chua dagiti kailian na a saan pay laeng agilubbon gapo ta awan pay ti dimmanon iti opisina na a guidelines wenno dagiti pagannurutan a nasken a masurot.
Nupay kasta, inlawlawag na nga apaman nga addan ti maawat na a surat wenno pakaammo manipod iti Gobierno Probinsial a mangibagbaga a mayaten ti panagkalubbon ti motorsiklo ket dagus na daytoy nga iyimplementar iti ciudad.
Mainaig iti daytoy, kuna ni Police Major Artemio Clemente, OIC ti Philippine National Police – Batac a kas mandar ni Mayor Chua kadakuada ket agtultuloy latta ti naiget a panangsita da kadagiti makita da nga agkalubbon iti motorsiklo.
Maipalagip nga inrakurak ni Gov. Matthew Marcos Manotoc a mabalinen ti panagkalubbon iti motorsiklo ken agtugaw iti likod ti driver ti tricycle ken maysa laeng ti mabalin nga aglugan iti uneg ti tricycle bayat a maiyur-uray pay laeng ti guidelines manipod iti Inter-Agency Task Force.
