LAOAG CITY – Mabalin nga ibabawi ti Land Transportation Office wenno LTO ti lisensia dagiti motorista a mapaneknekan a nangikabil iti peggad kadagiti pedestrian.
Daytoy ket kasaruno iti naiparuk-at a Memorandum No. MVL-2026-229 a nangikaddeng ti ad-adda a nalawag a proseso iti panangdokumento ken panangimbestigar kadagiti insidente a pakairamanan dagiti pedestrian.
Iti babaen ti memorandum, posible a madeklerar nga “Improper Person to Operate a Motor Vehicle” ti motorista maiyataday iti Republic Act No. 4136 wenno Land Transportation and Traffic Code.
Possible daytoy a pangibasaran iti panangbabawi ti lisensia ngem kasapulan latta ti dumalan iti maitutop a proseso ken maipaayan ti due process ti motorista.
Partikular a sakop ti polisia dagiti insidente iti pedestrian lanes wenno designated pedestrian crossing.
Pakairamanan kadagiti pedestrian ket dagiti ubbing, senior citizen, person with disabilities, dagiti agus-usar ti wheelchair, saklat, tungkod ken dadduma pay a mobility devices.
Malaksid iti daytoy, sakupna pay dagiti indibidual nga agidurduron ti stroller wenno kariton, dagiti pasaheros a bumaba wenno sumakay pay laeng iti lugan, traffic enforcer, road worker ken dadduma pay nga otorisado a personnel a mangisaysayangkat ti akem iti kalsada.
Nupay kasta, inlawlawag ti ahensia a tingitingen latta ti tunggal insidente basar iti pakabuklan a napasamak, karaman ti tignay ti pedestrian, sakbay ti panangipatungpal ti maitutuop nga administrative action.
Segun ken ni Land Transportation Office Chief Assistant Secretary Markus Lacanilao, gagem ti addang a maprotehiran ti biag dagiti pedestrian ken mapagsungbat dagiti motorista a mangikabil kadagitoy iti peggad.
