LAOAG CITY – Maalarma ti Department of Health (DOH), gapu iti dakkel a pagkurkurangan ti dentista iti pagilian, nga addaan ti dentist-to-population ratio a 1 iti 53,000.
Kuna ti ahensya a dakkel unay ti pagkurkurangan daytoy no ikompara iti standard ti World Health Organization a 1 iti kada 7,500 nga indibidual.
Inbatad ni Health Undersecretary Emmie Perez, a gapu iti daytoy ket 9 manipod iti 10 nga ubbing a Pilipino ket makapaspasar ti tooth decay wenno dadduma pay a dental problems.
Inpetteng ni Perez a maysa a rason ti panagkurkurang ti dentista iti pagilian ket ti nababa a sweldo iti gobierno nga agbalbalin a lapped iti recruitment ken retention ti dentista.
Innayon na a masansan a maiwalwalin ti oral health uray napateg daytoy iti pakabuklan a salun-at isut gapuna a ginutigot na private sector a makitinnulong kadagiti programa ti gobyerno.
