LAOAG CITY – Inrakurak ni Vice President Sara Duterte a palubusan isuda ti International Criminal Court a mangisayangkat ti panagsapata ni dati a Presidente Rodrigo Duterte kalpasan a nangabak daytoy iti kina-Mayor idiay Davao City iti kaliplippas a 2025 Midterm Elections.
Segun iti Bise Presidente, iyur-urnos laengen dagiti abugadoda iti International Criminal Court ken ditoy Pilipinas ti proseso.
Inbatadna nga inikkan isuda ti International Criminal Court ti agingga iti pangaldaw inton Hunio 30 tapno isayangkat ti panagsapata.
Inlawlawagna nga apaman a maalada ti proclamation papers ti dati a Presidente ket mabalinen nga iyuswat ti panagsapatana.
Kabayatanna, saan met a dinakamat ti Bise Presidente no kasano nga aramiden ti panagserbi ti amana kas baro a Mayor idiay siudad ti Davao.
