LAOAG CITY – Inburay ni Dr. Kryzca Pasigui a residente ti Brgy. Talingaan ditoy siudad ti Laoag nga ubing pay laeng ket kalikagumna ti agbalinen a maysa a doktor.
Segun kenkuana, arig saan a nakapapati a natungpalna ti arapaapna sipod pay idi ubing daytoy nangruna ket awan met ti doktor iti pamiliada ken saanda a naggapu iti nabaknang a pamilia.
Inbatadna a nagturpos daytoy iti Bachelor of Science in Pharmacy kas Cum Laude iti Mariano Marcos State University iti siudad ti Batac.
Inlawlawagna a kalikagumna a matulungan dagiti masakit nangruna kadagiti pasiente a nakukurapay.
Kunana a sakbay pay a nagbalin a naan-anay a doktor ket nagbalin isuna a Sangguniang Kabataan Chairperson iti bukudda a barangay no sadinno a nagserbi daytoy kadagiti kabarangayanna.
Nupay kasta, naammirisna a napinpintas ken ad-adu pay ti matulunganna nga umili no ituloyna ti panagbasana iti kina-doktor isu a napanunutanna nga ituloy nga agbasa.
Innayonna a saan a nagbalin a nalaka ti pananggun-odna iti arapaapna gapu ta pinaggeddanna ti panagbalin kas Sangguniang Kabataan Chairperson ken iti panagadalna iti kina-doktor.
