LAOAG CITY – Naiyalud-od ti 10 nga aldaw ti panagtalinaed dagiti pito a linemen ti Ilocos Norte Electric Cooperative wenno INEC a napan timmulong iti pannakaisubli ti linya ti kuriente idiay Pangasinan gapu kadagiti naglabas a bagyo ken pinapigsa pay ti angin abagat.
Gapu iti daytoy, nagturong ni Acting General Manager Perry Martinez iti nasao a kooperatiba idiay Bolinao, Pangasinan tapno kumustaen ti kasasaad dagiti linemen ken ikkan ti nayon nga allowance dagitoy.
Mainaig iti daytoy, nagselebrar ti Linemen’s Appreciation Day dagiti nasao a linemen idiay Pangasinan gapu ta saanda a nakapagselebrar ditoy probinsia kaduada ti Acting General Manager.
Nagyaman ni Martinez kadagiti amin a frontliners iti kinaanus iti trabahoda ken ti panangipasigurado a maaddaan amin dagiti pagtaengan ti koneksion ti kuriente.
Maipalagip a napan dagiti pito a linemen iti probinsia ti Pangasinan idi Hulio 27 babaen ti inisyatibo ni Martinez tapno tumulong iti pannakaisubli dagiti naperdi a linya ti kuriente.
