LOAG CITY – Naikeddeng ti panagtataripnong ti Iran ken kadagiti kabangibangna a pagilian iti Gulf iti Oman tapno talantanen ti seguridad ken sitwasion iti Strait of Hormuz.
Segun iti Iranian Foreign Ministry, kalikagum ti nasao a panagtitipon a papigsaen ti relasionda ken masigurado ti kinatalged dagiti dumaldalyasat iti estratehiko a pagdalanan ti barko.
Naapektaran ti natalged a panagayus ti langis iti Starit of Hormuz kalpasan kadagiti nagsasaruno a panagatake ken tension iti nagbaetan ti Estados Unidos, Israel ken Iran a nangitunda ti panagngato ti presio ti langis iti sumurok $100 iti kada bariles.
Inlawlawag ti Tehran a dagiti isyu ti rehiyonda ket masapol a maresolbar dagiti pagilian iti Middle East pakairamanan kadagiti kaalyado iti Gulf Cooperation Council ken Iraq.
Maiwayat ti panagtataripnogda kalpasan dagiti immunanan a katulagan ti Iran ken Oman mainaig iti temporario a shipping route ken ti pannakaikkat kadagiti pagminaan iti lugar.
Kabayatanna, agtultuloy ti panangbabalaw ti Iran kadagiti sanksion ken blokeo ti Estados Unidos ken Israel bayat ti panangipetpetteng ti Washington a saanda a palubosan a maaddaan ti nuclear nga armas ti Tehran.
