LAOAG CITY – Nagballaag ti Civil Aviation Authority of the Philippines (CAAP) kadagiti tattao a saanda a paturongan ti laser beams wenno sabali pay nga high-intensity lights dagiti eroplano gapu ta mabalin daytoy a mangitunda ti disgrasia.
Inbatad ti Civil Aviation Authority of the Philippines a ti laser illumination ket mabalin a makaapektar iti panagkita ti piloto ken mangitunda iti temporario a disorientation a mabalin a makaapertar ti natalged a biahe iti tangatang wenno manarimaan ti panag-landing ti eroplano.
Inlawlawagna a no mapaneknekan ket mabalin nga umabot iti tallo a tawen a pannakaibalud ti posible a sangoen ti naglabsing ken mamulta a mangrugi ti P50,000 agingga P500,000 wenno depende ti agbalin a desision ti korte.
Innayon ti ahensia dagiti sabali pay a maipawil nga aramiden pakairamanan ditoy dagiti panagpatayab dagiti saan nga otorisado nga aerial objects, panagtaraken ti tumatayab a mabalin a mangitunda ti bird strike, panagpastrek ti dingwen iti airport premises ken panagpatakder kadagiti istruktura nga awan pammalubosna.
Kabayatanna, dagitoy nga aktibidad ket makaapektar pay ti aviation communications ken navigation systems isu a napateg a suroten dagiti pagannurotan tapno maliklikan ti disgrasia.
