LAOAG CITY – Mamati ti kampo ni Vice President Sara Duterte a mabalin a mapaalisto ti proseso ti impeachment trial no naan-anay a maibasura weno ibabawi ti prosecution panel ti Article 3, a pakatrataran dagiti alegasyon ti bribery wenno panagpasuksuk kadagiti opisyal ti Department of Education.
Segun ken ni Defense Deputy Spokesperson Atty. Justin Nicol Gular, iyur-uray da paylaeng ti agbalin a pinal a desisyon ti prosekusyon no ibabawi, pagtalinaeden wenno ituloy ti nasao a pammilin sakbay a mangiparuk-at da ti nayun nga opisyal a rakurak.
Inpetteng ni Gular a respetaren ti depensa ti aniaman nga agbalin a desisyon ti prosekusyon ken nakasagana da a mangi-adjust kadagiti legal a preparasyon maibasar iti maiparuk-at a desisyon.
Malaksid iti daytoy, silulukat pay ti kampo ti Bise Presidente kadagiti nailungalong nga stipulation manipod iti prosecution panel.
Nupay kasta, kasapulan nga umuna a tingitingen ken adalen a naimbag dagiti probisyon na sakbay a mangipaay ti opisyal a sungbat.
Inpasingked ti legal team a nakasagana da iti at-atiddog a trial sessions, karaman ti sibubukel nga aldaw a panagdengngeg.
Inpaganetget pay ni Atty. Gular a karamanen iti sibubukel preparasyon da ti panagbalin a nakasagana, saan laeng nga iti legal issue ken dagiti dokumento, no di ket uray iti pisikal ken mental a karit iti at-atiddog a panagdengngeg.
