LAOAG CITY – Target ti House prosecution panel a lippasen inton sumaruno a lawas ti pannakaidasar dagiti ebidensia mainaig ti Article 1 ti impeachment case kontra ken ni Vice President Sara Duterte, no sadinno a daytoy ket nakasentro kadagiti alegasion ti saan nga umno a pannakausar ken irregular a liquidation ti confidential funds ti Office of the Vice President (OVP) ken Department of Education (DepEd).
Segun ken ni Chua, bassit laengen ti nabati a testigo nga idasar ti prosekusion para iti Article 1. Pakairamanan ditoy ni dati a DepEd Special Disbursing Officer Edward Fajarda ken maysa wenno dua pay a posible nga agtestigo.
Naikeddeng nga agparang ni Fajarda iti impeachment court inton Setiembre 7 kalpasan a naitantan ti testimonia na gapu iti stroke. Pinasingkedan ti Senate Medical and Dental Bureau ti kasasaadna ken inrekomendana ti panaginana sakbay a maipasango iti panangusig.
Kabayatanna, naidasar a prosecution witness ni dati a DepEd Undersecretary Michael Poa a naideklara a hostile witness ti impeachment court. Napagsaludsodan mainaig iti P112.5 million a confidential funds ti DepEd kabayatan ti panagtakem ni Duterte kas education secretary.
Immuna nga inbatad ti prosecution nga umdasen ti testimonia da Army Col. Manaros Boransing II ken Col. Magtangol Panopio mainaig iti Youth Leadership Summits ken military certifications nga inusar ti DepEd kas paset dagiti naisubmitir a dokumento mainaig iti liquidation ti confidential funds.
Pinaneknekan ni Boransing nga awan ti nadakamat a pondo ti DepEd iti inpaayna a sertipikasion ken awan ti personal a pannakaammona no kasano nga inusar ti ahensia ti confidential funds. Kinuna pay ni Panopio a ti sertipikasionna ket mangpasingked laeng a naangay ti Youth Leadership Summit ken saanna a paneknekan no kasano a nagastos ti DepEd ti confidential funds.
