LAOAG CITY – Inpakaammo ni Bombo International News Correspondent Rene Ballenas manipud idiay Estados Unidos a saan pay unay a marikna idiay Amerika ti pannakaipatungpal ti nayon a taripa kadagiti tallo a pagilian pakairamanan ti China, Mexico ken Canada.
Nupay kasta, inlawlawagna a posible a mariknada ti pannakaipakat ti nayon a taripa kalpasan ti maysa wenno dua a bulan babaen ti panagngina ti presio dagiti kangrunaan a magatgatang kadagiti pasdek negosio.
Segun kenkuana, dagiti export manipud idiay Canada ken Mexico nga agturong idiay Estados Unidos ket mapatawan ti 25% a taripa uray ti pangal-alaan ti enerhia manipud idiay Canada ket maaddaan ti nababbaba a taripa a 10%.
Inbatadna a dagiti negosio met idiay China nga agdama nga addan ti taripa dagitoyen ket makapasar pay ti nayon a a 10% a taripa.
Maipalagip a nangipataw ti nalawa a panangngato ti taripa ni United States President Donald Trump kadagiti kangrunaan a partners ti Estados Unidos maipapan iti negosio kas ti Canada, Mexico ken China iti kallabes.
Immuna iti daytoy, ti nasao a tignay ni Trump ket gapu iti maipagarup a lumawlawa nga illegal immigration ken pakairamanan ti panagserrek ti illegal drugs iti pagilianda.
