LAOAG CITY – Saan a natuloy ti pannakaaramid ti isolation room iti Laoag City General Hospital (LCGH) ditoy ciudad ti Laoag.
Daytoy ti inbatad ni Doctor Elizer Asuncion, ti chief of hospital iti LCGH.
Inlawlawag na a saan a natuloy ti pannakaipasdek ti isolation room gapu iti ado nga aspeto kas ti panagkurkurang dagiti doktor gapu ta 10 da laeng ken kurang pay ti empleado iti nasao nga ospital.
Inbaga na a pinadas da ti nagaramid ti tallo a team a ti kada team ket pito nga aldaw nga agduty ken 14 nga aldaw nga ag-quarantine dagitoy.
Nupay kasta, inbatad ni Asuncion a saan a makaumanay dagiti empleado gapu ta no sumublat ti maysa a team nga agbakasyon ket saan a kabaelan ti mabati a team ti trabaho gapu ta saan to pay a nakasubli ti immuna a team a nag-quarantine.
Innayon na a ti problema pay ket ti kaawan ti pondo nga usaren da a pangsweldo kadagiti maala koma a nayun nga empleato ti ospital.
Kabayatanna, adda ti maysa a naka-isolate iti LCGH a naggapo idiay Singapore kalpasan a nagpadara ngem awan ti pakainaigan ti covid-19.
Naamoan a na-isolate laeng ti maseknan ta daytoy ket Person Under Monitoring gapu ta kagapgapu na idiay Singapore.
