LAOAG CITY – Inpakammo ni Mr. Ronald Puño iti DSWD nga adon dagiti nagturpos a miembro ti Pantawid Pamilya Pilipino Program (4Ps) ditoy probinsya gapo ta simmayaaten ti panagbiag dagitoy.
Segun kenni Puño, karaman dagiti timmulong kadagiti benipisyaryo iti local, probinsya, region ken iti national a gobierno ken dadduma pay a kabinnulig na kas iti pribado a sector, civil society organization tapno rumang-ay ti panagbiag dagitoy.
Inlawlawag na nga iti babaen ti Republic Act No. 11310 wenno ti 4Ps Act, umabot laeng iti pito a tawen ken iti uneg daytoy a tawen ket ikarigatan dagiti maseknan a dagiti benipisyaryo ket rumang-ay ti panagbiag da.
Kunana a ditoy probinsya ket umabot iti 18,632 households ti miembro iti 4Ps ken ado dagiti nag-exit gapo ta awanen ti mamonmonitor nga ubbing da iti pagtaengan nga agtawen ti 0-18 rason nga otomatiko a maikkat dagitoy iti programa, ken adon dagiti graduate.
Nupay kasta, kunana a sakbay iti daytoy ket adda ti preparation phase wenno session para kadakuada tapno nakasagana dagitoy ken kabinnulig da ti lokal a gobierno.
Mainaig iti daytoy, kunana nga iti panangrugi pay laeng ti programa ket maiyus-uswaten ti pannakadalos iti listaan dagiti benipisyaryo.
Inbatad na pay a masursurot ti mekanismo a Grievance Redress System tapno amin a reklamo ket matratar a nasayaat.
Dinakamat na a nawaya ti publiko a mangipadanon kadakuada ti nagan ti patyen da a saanen a kwalipikado ken ma-validate daytoy.
Inadmitir met ni Puño nga adda latta dagiti aglibak ngem ar-aramiden da met ti responsibilidad da tapno ma-asssess amin dagitoy.
Maipalagip nga adda ti pammilin ni President Bongbong Marcos a madalusan ti listaan ti 4Ps.
