LAOAG CITY – Inbatad ni Police Chief Master Sergeant Harold Nicolas, ti mangidadaulo ti Provincial Drug Enforcement Agency (PDEU) ditoy probinsya a respetaren da ti panangibasura ti korte ti inpila da a kaso kontra ken ni Atty. Michael Llaguno ditoy ciudad ti Laoag.
Inadmitir na a maladingitan da iti napasamak ngem masapol nga awaten da ti nagbalin a pangngeddeng ti RTC Branch 14 ditoy ciudad ti Laoag.
Inlawlawag ni Nicolas a ti rason no apay a naibasura ti kaso nga inpila da kontra ken ni Llaguno ket gapu ta saan da a naipaay amin a requirements kabayatan ti operasyon kas kadagiti testigo.
Inbaga na a basar iti inparuk-at a ruling ti korte suprema iti nasapa a paset ita a tawen ket masapol nga adda dagiti tallo a testigo sakbay, kabayatan ken kalpasan ti operasyon.
Innayon na a dagiti tallo a testigo ket manipod iti DOJ, media, ken opisyal ti barangay.
Maipalagip nga iti pannakatiliw ni Llaguno idi Hulyo 29 itay napan a tawen ket adda laengen dagiti testigo kabayatan ti pannakaimbentaryo dagiti naala a kontrabando manipod iti suspek.
Inpetteng ni Nicolas a ti pannakaibasura ti kaso ni Llaguno ket saanna a kayat a sawen nga inosente wenno guilty iti kaso na no di ket gapu ta adda dagiti saanda a naipaay a requirements kabayatan ti operasyon.
Malaksid iti saan a dagus a panagturong dagiti testigo ket inlaban pay ni Llaguno ti makunkuna a chain of custody.
