LAOAG CTY – Iyur-uray ti gobierno probinsial kangrunaanna ken ni Gob. Matthew Marcos Manotoc ken ti Provincial Veterinary Office a maideklarar manen ti Ilocos Norte nga African Swine Fever Free wenno maipan iti babaen ti yellow zone.
Mainaig iti daytoy, inbunannag ni Dr. Loida Valenzuela, Provincial Veterinarian ti Ilocos Norte nga intuding ti opisinada idi Pebrero 15 a maudi a panagisubmitir dagiti Local Government Units wenno LGU’s kadagiti kasapulan a papeles para iti pannakatingiting no kasapulan a maikkanen dagitoy ti sertipikasyon a pannakaipanen dagitoy iti yellow zone.
Inlawlawagna a sumagmamano kadagiti Local Government Units a nakaisubmitiren kadagiti kasapulan a papeles tapno maideklararen dagitoy nga adda iti yellow zone manipud iti pink zone.
Kunana a naisubmitir met ti Provincial Veterinary Office dagiti nasao a papeles dagiti maseknan a Local Government Units iti Regional Veterinary Office ita nga aldaw.
Inpalgakna a ditoy Siudad ti Laoag ket maiyur-uray pay laeng a maileppas ti siam a pulo nga aldaw a kas iti nailanad iti pagalagadan ti gobierno nasional tapno makapangrugi da metten manipud iti red zone, mapagbalin a pink zone ken manipud iti pink ken mapagbalin a yellow zone.
Innayon ni Valenzuela a mabalin a tuladen iti Siudad ti Laoag ti inaramid iti ili ti Solsona a dua ti insubmitir a naggiddan ti red to pink ken pink to yellow zone.
