LAOAG CITY – Suportaran ti Energy Regulatory Commission (ERC) ti inlungalong ni Presidente Ferdinand Marcos Jr. nga amendaran ti Electric Power Industry Reform Act (EPIRA) tapno ikkaten ti system loss charge iti bayadan ti kuryente dagiti consumer.
Basar iti ERC, nakasagana a makitinnulong iti Kongreso, Department of Energy (DOE) ken dadduma pay nga ahensya tapno mailungalong dagiti kasapulan a linteg ken regulasyon.
Iti maikalima nga State of the Nation Address (SONA), kiniddaw ni Marcos iti Kongreso nga ikkaten ti system loss charge tapno makissayan ti paggastusan iti kuryente dagiti pamilya ken negosyo.
Ti system loss ket dagiti kuryente a mapukpukaw kabayatan ti panangipatulod ken panangibunong gapu iti teknikal a rason wenno iligal a koneksyon kas ti jumper ken panagtakaw ti kuryente.
Iti babaen ti agdama a linteg, karaman ti EPIRA ken Republic Act No. 7832, mabalin nga ipasa dagiti distribution utility ti paset ti system loss kadagiti consumer iti babaen ti system loss charge.
