LAOAG CITY – Inpakaammo ti maysa a private lawyer a ni Atty. Elreneo Kidd Castro a kasapulan ti pannakaipaiget iti pannakaipatungpal ti orientation program kadagiti pagadalan tapno maliklikan ti bullying.
Daytoy ket kalpasan nga adda ti nag-viral a video iti social media iti panangdangran dagiti estudiante kadagiti padada met laeng nga estudiante iti uneg ti classroom ti maysa a pagadalan idiay Narvacan, Ilocos Sur.
Segun ken ni Atty. Castro, nasken a maipakaammo ken maipaadal a naimbag kadagiti amin nga estudiante pakairamanan dagiti mangisursuro maipanggep iti linaon ti school manual tapno ammo dagitoy ti rumbeng nga aramidenda.
Inpettengna a masapul a palagipan dagiti nagannak dagiti annakda nga adda ti pagsungsungbatanda iti linteg tapno saan dagitoy a makaaramid ti maikanniwas iti paglintegan.
Inbatadna nga agbalbalin laeng a paulit-ulit daytoy nga isyu gapu ta saanen a maiyul-uli dagitoy a kaso iti nangatngato gapu ta masolbaren iti uneg ti pagadalan.
Inlawlawagna nga iti baet a saan a mabalin a sumango iti criminal liability ti maysa nga ubing wenno agtawen ti 15 ken agpababa ket mabalin dagitoy a mapatawan ti civil liability no sadinno a dagiti nagannak kadakuada ti mapagsungbat gapu iti inaramidda.
Kunana a rumbeng laeng nga ikkan ti pateg iti pannakaipatungpal ti Anti-Bullying Policy iti uneg ti pagadalan tapno ad-adda a maiparipirip kadakuada ti umno a talugading.
