LAOAG CITY – Inlawlawag ni Doctor Norman Rabago, ti covid-19 consultant ditoy Ilocos Norte no apay nga adda pay laeng dagiti ili ken ciudad ditoy probinsya a nagtalinaed iti babaen ti Modified Enhanced Community Quarantine (MECQ) idinto a ti kaadoan nga ili ket naipan da iti General Community Quarantine (GCQ).
Dagiti nagtalinaed iti MECQ ket iti ili ti Burgos, Marcos, Bangui, ciudad ti Batac ken ditoy ciudad ti Laoag.
Inbaga na a dagiti lugar a nagtalinaed iti babaen ti MECQ ket nangato pay laeng ti kaso da iti covid-19.
Inbatad pay ni Doctor Rabago nga iti baet a bumabbaban ti kaso ti covid-19 ditoy probinsya ket saan a rumbeng nga agkampante gapu ta adda ti posibilidad na a ngumato manen no saan a sumurot kadagiti health protocols.
Inkalintegan na a karaman a nagtalinaed nga MECQ iti ili ti Marcos gapu ta iti baet a nababa ti active cases na iti covid-19 ket adda latta ti panagngato-ngato na.
Mainaig iti daytoy, inbaga ni Rabago a naipalaon pay iti Executive Order (EO) ni Governor Matthew Marcos-Manotoc a masapol a mapapigsa dagiti barangay contact tracing team kasta met ti Municipal ken provincial contact tracing team tapno maiyuswat ti alisto a panageksamen ken maisolate a dagus dagiti makaptan ti virus.
Innayon na a maobserbaran a dakkel ti maitulong ti istrikto a Quarantine protocols tapno maipababa ti kaso ti covid-19 ngem saan latta a maliklikan a maapektaran ti ekonomiya ti probinsya kangrunaan ditoy ciudad ti Laoag.
Nupay kasta, kuna ni Rabago nga ikarkarigatan ti gobierno probinsyal iti panangidaulo ni Gobernador Manotoc tapno maibalanse ti ekonomiya ken salun-at isut gapuna a kasapulan nga aganus iti agdama a sitwasyon ditoy probinsya.
