LAOAG CITY – Suportado ni House Speaker Faustino “Bojie” G. Dy III ti mailunglungalong a gakat a gagem a mangiyestablisar ti maysa a nationwide Integrated Emergency Medical Services System (EMSS) tapno masigurado nga alisto, naurnos ken de-kalidad a serbisio medikal ti maipadanon iti pagilian.
Daytoy ket kalpasan nga inaprobaran ti House Committee on Health ti konsolidasion ti siam a gakat a gagem nga aramiden nga institusional ti Integrated Emergency Medical Services System iti nailian, rehional ken lokal a tukad.
Inbatad ni Committee Chair ken Batanes Rep. Ciriaco Gato Jr., a nupay adda ti nailian nga emergency hotline a maysan a dekada ti napalabas ket kurang latta ti pagilian iti napagtipon a sistema.
Ti agdama nga agsisina a sistema ket agbalbalin a rason ti nabayag a response time ken dagiti pannakatay a mabalin koma a maliklikan.
Iti babaen ti baro a gakat, maaddaan ti maymaysa a nailian a pagannurotan iti panagsanay dagiti responder, emergency transport, koordinasion kadagiti ospital ken pagalagadan dagiti ambulansia.
Naiget ti suporta ti Department of Health (DOH) iti babaen ken ni Undersecretary Dr. Albert Francis Domingo a nangipetteng iti kinapateg ti panangpapigsa iti pre-hospital emergency care nangruna kadagiti nasulinek a lugar.
