Ninigar Brgy. Kagawad Willy Visitacion iti Brgy. 19-A Tambidao iti ili ti Bacarra ti agwarwaras a damag a maipagarup nga adda ti naangay a party iti Sitio Saak iti barangay da kalpasan a naamoan a negatibo ti resulta ti swab test dagiti kabarangayanna.
Segun ken ni Visitacion, awan ti naipadanun a report kadakuada mainaig kadagiti maipagarup a nangiyuswat ti party.
Mainaig iti daytoy, kuna na nga adda ti baboy a nagbibingayan dagiti naka-lockdown kas ayuda dagitoy ngem awan ti naiyuswat a party.
Inbunannag na a ti baboy ket saan a dagiti maseknan nga adda iti lockdown ti nangparti nu di ket naggapo iti slaughter house.
Innayun na nga adda dagiti nakabantay a tanod iti sitio a naka-lockdown ken awan pay a pulos ti naaw-awat da a report seknan iti maipagarup a pannakaiyuswat ti party.
Immuna iti daytoy, inpakaamo ni Visitacion a 19 a kabarangayanna nga adda iti maymaysa a sitio ti naggigiddan a dimmalan iti quarantine ken swab testing gapu iti ka-adda ti exposure da kadagiti nagpositibo ti virus iti ili ti Sarrat.
Nu pay kasta, inbatad na a negatibo amin ti resulta dagitoy malaksid laeng kenni IN-C421 nga agtawen ti lima nga ubing.
Innayun na a ti ubing a nagpositibo ket agpapada da kadagiti nagannak na a naka-isolate iti pagtaenganda.
Kabayatanna, inpetteng ni Ms. Mayrose Damo, maysa kadagiti naka-quarantine ken nalock-down iti Brgy. 19-A Tambidao iti ili ti Bacarra nga awan ti naangay a panaggu-umong wenno party iti lugar da.
Inbatad na a nu man adda ti tattao iti compound da ket isuda met laeng amin nga agkakapamilya a dumaldalan iti quarantine gapu iti pannaka-expose da kadagiti nagpositibo ti virus ken iti kaanakan na a ni IN-C421.
Kuna na a saan nga isuda ti nagparti ti baboy ken nabingaybingay iti kada pamilya saan ketdi a naggu-umong da tapno agselbrar kas maibasar kadagiti agwarwaras a palso a damag.
Innayun na a manipod idi Nobiembre 27 a naamoan da a positibo iti covid-19 ti nakapulapol da ken babaen ti mandato ti municipal health office iti ili ti Bacarra ket nai-lockdown da a dagus a 19 nga agkakapamilya nga adda iti maymaysa a sitio wenno compound ken naiget a sursuruten da ti health protocols.
Immunan nga adda ti naipadanon iti Bombo Radyo a maipagarup nga adda ti naiyuswat a party ken nagparparti ti baboy iti Brgy. 19 partikular iti compound dagiti dimmalan iti swab test nga agdama a naka-quarantine.
