LAOAG CITY – Inpetteng ni Presidente Ferdinand Marcos Jr. a saan nga isuna ti nasken a mangalay-ay ti tension no diket dagiti tattao a nangirugi ti riribok.
Inbatadna a saan a pulos nga isuna ti mangirugrugi ti riribok kontra iti aniaman a grupo gapu ta ti ar-aramidenna laeng ket agtrabaho.
Saanen nga innaganan ni Presidente Marcos no asino ti dakdakamatenna a nangdegdeg iti kumarkaro a situasion ngem kunana a naruay ti karaman.
Binabalaw ti Presidente ti sumagmamano a pulitiko nga inawaganna nga “obstructionists” nga awan ti ar-aramidenda no diket mangriribok ken kontraen ti amin nga addang ti administrasion.
Inpaganetgetna a saan nga agtigtignay dagitoy para iti pagsayaatan dagiti umili no diket para laeng iti bukudda nga interes.
Sumangsango ti administrasion iti naiget a tension iti pulitika kagiddan ti nagbaetan ti Presidente ken ni Vice President Sara Duterte, panagbalbaliw ti puersa iti Senado ken umas-asidegen nga impeachment trial kontra iti Bise Presidente.
