LAOAG CITY – Nabara ti panangsarabo dagiti agpapaay ken pasyente iti Mariano Marcos Memorial Hospital and Medical Center iti ciudad ti Batac ken ni Presidente Ferdinand Marcos Jr.
Ni Presidente Marcos ket napan bimmisita iti nasao nga ospital tapno personal nga amwen ti implementasyon ti Zero Balance Billing Program.
Kadwa ni Presidente Marcos a bimissita iti Mariano Marcos Memorial Hospital and Medical Center ti maysa kadagiti annak na a ni Joseph Simon, ken ni Governor Cecilia Araneta-Marcos.
Iti ibibisita ti presidente ket adda ti naipaay a bagas kadagiti pasyente iti nadakamat nga ospital.
Mismo a ni Dr. Jose Orosa III, ti Chief of Medical Professional Staff iti Mariano Marcos Memorial Hospital and Medical Center ti nangbayabay iti presidente bayat ti panagsursur na iti ospital.
Karaman a tinurong ti presidente ket ti charity wards, emergency room, ken ti neonatal and intensive care units.
