LAOAG CITY – Imbilin ni Presidente Ferdinand Marcos Jr. dagiti nagduduma nga ahensia ti gobierno ken lokal nga opisial ti naiget a pannakaimplementar kadagiti pagalagadan ti panagpatakder ti pasdek kas paset ti kalikagum ti pagilian nga agbalin a natibker kadagiti gingined, layos, ken dadduma pay a kalamidad.
Iti maysa a press briefing, impakaammo ni Palace press officer Claire Castro ti pammilin ni Presidente Marcos iti Department of Public Works and Highways (DPWH) nga ipasigurado ti quality standards ti panangipatakder ti maysa a pasdek partikular kadagiti lugar a makapaspasar ti nakaro a paniempo.
Ti pammilin ket kageddan ti rekomendasion ti Private Sector Advisory Council (PSAC) ti napigpigsa a pagannurotan ti structural resilience, a pakairamanan ti naiget a pannakaipatungpal standards para kadagiti construction materials a maiyataday iti earthquake-resilience requirements.
