LAOAG CITY – Inbatad ni Presidente Ferdinand Marcos Jr. a 90 a porsienton ti nalpas iti speech na para iti State of the Nation Address (SONA) intono Lunes, Hulyo 27.
Ireport na kadagiti umili dagiti nagapwanan ti administrasyon na ken dagiti ar-aramiden da a solusyon kadagiti agdama a karit para iti pagilian.
Kuna ti presidente a karaman iti report na dagiti napasamak sipud idi naudi nga State of the Nation Address na ti napalabas a tawen.
Inrakurak daytoy ti presidente iti panangidaulo na iti inagurasyon ti Department of Health–Jose B. Lingad Children’s Medical Center iti Clark Freeport Zone iti Mabalacat City, Pampanga.
Inpakaammo ni Presidente Marcos Jr. nga iti baet a 90 a porsienton ti nalpas iti report na ket agtultuloy latta ti panangrebisar na agingga iti maudi a minuto tapno masigurado a maitutop a maiparangarang dagiti prayoridad ti administrasyon.
Iti pannakasaludsud no adda ti dakamaten ti presidente maipanggep iti isyu ti korapsyon kas ti naibutaktak na iti naudi nga State of the Nation Address na, insungbat na laeng a padaanan ti sumaruno a pagteng.
