LAOAG CITY – Inpaganetget ni Presidente Ferdinand Marcos Jr. a saan laeng a ti kinapaspas ti internet ti pagrukudan ti panagdur-as ti pagilian no diket no mano ti kaadu dagiti biag dagiti Pilipino ti agbalbalin a nasayaat babaen ti konektibidad.
Segun kenkuana, nasken nga agresulta ti digital access ti pudno nga oportunidad para kadagiti estudiante, mangmangged, pamilia ken komunidad iti intero a pagilian.
Iti panagbitlana iti napalabas a Telco Summit 2026, kuna ti Presidente nga iti baet a simmayaat ti kinapaspas ti broadband ken mobile internet daytoy kadagiti naglabas a tawen, ti pudno a pagrukudan ti balligi ket no makaskastrek met laeng dagiti estudiante kadagiti nasusulinek a lugar ti online classes, no maka-access dagiti pamilia iti health ken financial services iti digital a wagas ken no al-alisto a makakonektar dagiti umili iti impormasion ken dagiti programa a pang-gobierno a makatulong iti panagbiagda.
Kuna ni Marcos, ti sektor ti telekomunikasion iti pagilian ket agbalor ti sumurok $6 bilyon ket mangipasimudaag iti agtultuloy a panagpuunan ken dagiti progresibo a reporma a maiyataday iti pammati a ti digital access ket mabalin a mangiduron iti nadurdur-as a pagilian.
