LAOAG CITY – Nakasagana ni Presidente Ferdinand Marcos Jr. a dumngeg ti aniaman nga ibutaktak ni dati a Congressman Zaldy Co kadagiti tattao a karaman iti maanomalya a flood control projects.
Daytoy ti sungbat ni Palace Press Officer Atty. Claire Castro iti saludsod no ania ti nagbalin a reaksion ti Presidente kalpasan a naarestaren ni Co.
Inbatad ni Castro, naragsak ni Presidente Marcos a naarestaren ni Co nangruna ket maysa daytoy kadagiti maibilang a big fish iti flood control anomaly a mapagsungbat iti linteg.
Iti baet nga immunan nga inraman ti dati a kongresista ni Presidente Marcos iti anomalya iti flood control scandal, mamati ni Castro nga ibutaktak ni Co ti kinapundo ken ibutaktakna no asino dagiti kaduana pay iti flood control scam.
Gapu iti daytoy, kunana a nakasagana ti Presidente a dumngeg iti amin nga ibutaktak dagiti tattao a karaman ken nasken a mapagsungbat iti linteg.
