LAOAG CITY – Umabot iti 175,565 a Pilipino iti sumurok-kumurang 282 a sites iti intero a pagilian ti manamnama a mabenepisiaran iti medical services ken kadagtiti dadduma pay a tulong nga indatag ti gobierno.
Iti BBM VLOG 284: Kaarawan, inbatad ni Presidente Ferdinand Bongbong Marcos a karaman kadagiti manamnama a maipaay a serbisio ti temporario a pannakaipalawa ti Zero Balance Billing iti sumurok-kumurang 132 nga ospital iti intero a pagilian.
Segun iti Presidente, malaksid kadagiti pasiente nga adda kadagiti ward accomodation ti Zero Balance Billing, karaman pay iti nasao a birthday initiative-na dagiti pasiente kadagti dadduma pay a hospital rooms.
Malaksid kadaytoy, naiwayat pay ti community ken school-based medical checkups, panangipaay ti libre nga agas, wheelchair ken kadagiti dadduma pay a government services.
Kabayatanna, ti regular Zero Balance Billing program ti gobierno ket agtultuloy a nakapokus kadagiti pasiente a naka-confine kadagiti basic wenno ward accomodation a sakupen dagiti pampubliko nga ospital, no sadinno sumurok 10.3 billion ti naaprubaran a pondo ita a bulan tapno masuposupan ti programa dagiti ospital ti Departmet of Health ken kadagiti napili a Local Government Unit hospital.
