LAOAG CITY – Inbatad ni Mr. Victor Dabalos, ti Provincial Environment and Natural Resources Officer (PENRO) iti Ilocos Norte a possible nga iti sumaruno a tawen ket awan ton ti pannakauram dagiti kabanbantayan ditoy probinsya.
Inlawlawag na a naadalan dan kadagiti napaspasamak nga uram kadagiti kabanbantayan ditoy probinsya nga umab-abot ti nasurok a sangaribo ng ektarya ti kalawa na dagiti naapektaran.
Inpakaammo ni Dabalos a babaen ti binukel ni Governor Matthew Marcos-Manotoc a Firefighting Group ket masigurado nga awanen ti pannakauram dagiti kabanbantayan iti intero a probinsya.
Karaman kadagiti mangbukbukel iti Firefighting Group ket dagiti kameng ti Philippine National Police, Philippine Army, Bureau of Fire Protection, Marines, Local Government Units (LGUs), ken Department of Environment and Natural Resources (DENR).
Malaksid kadagitoy ket in-mobilize pay ni Governor Manotoc ti Philippine Airforce tapno helicopter ti mapan mangsebseb iti uram iti kabanbantayan a saan a madanun dagiti kameng ti Firefighting Group.
Inpakaammo ni Dabalos a ti nabukel a Firefighting Group ket addaan ti dua a command, daytoy ket ti firefighting command ken prevention command.
Inpanakkel pay ni Dabalos a naestablisar dan dagiti lugar a masansan a pakapaspasamakan ti uram, ania ti makagapu, sadinno dagiti pagserkan dagiti tattao, ken no ania dagiti rantada nga aramiden iti kabanbantayan.
Kuna na pay a mamati a ti puor ket aramid metlaeng ti tao isut gapuna a tao metlaeng ti makasolusyon iti daytoy.
Mainaig iti daytoy, inpakaammo ni Abalos a mangrugi intono Enero iti sumaruno a tawen ket ideploy danton dagiti tao da nga agbantay kadagiti kabanbantayan tapno masigurado a saanen a maulit ti pannakauram dagitoy a kas dagiti napaspasamak iti umuna a kwarter ita a tawen.
