LAOAG CITY – Inlawlawag ni Engr. Cynthia Iglesia iti Pag-asa DOST iti Laoag International Airport a ti perseverance rover a naipatulod iti planeta a Mars ket addaan ti uppat a misyon.
Segun kenni Iglesia, karaman kadagiti misyon ket tapno makita ti past environment ti planeta no sadinno ket mangkita ti senyales no adda ti nabiag iti planeta a Mars.
Malaksid it daytoy, kunana a ti perseverance rover ket agkolektar pay ti bato ken ma-test ti oxygen production iti nasao a planeta.
Inpakaammo na a ti perseverance rover ket pimmanaw ditoy lubong idi Hulyo 30, 2020 ken naglanding iti Pebrero 18 ita a tawen.
Kunana a kalpasan a naglanding iti planeta a Mars ti perseverance rover ket mamonmonitor met dagiti eksperto ken ita ket manarimaan ti panagkolektar ti samples ken adalen da daytoy.
Inbatad na a basar iti panagadal ken impormasyon manipud kadagiti eksperto, arig na nabasa ti planeta isut gapo na a posible nga adda ti nabiag iti daytoy ngem masapol pay ti naun-uneg nga imbestigasyon wenno panagadal.
Kabayatanna, kuna ni Iglesia a dagiti makolektar a samples iti test tube ti perseverance rover ket adda ti sabali a mapan mangala iti daytoy.
Innayon na nga umaboten iti tallo a rover ti adda iti nasao a planeta pakairamanan ti inpatulod ti UAE ken China.
