LAOAG CITY – Sinorpresa dagiti personnel ti Bureau of Jail Management and Penology (BJMP) iti ciudad ti Batac ti pamilya ti maysa kadagiti balud iti nasao a ciudad.
Daytoy ti inpakaammo ni Jail Chief Inspector Cremencio Alones Jr., jail warden iti ciudad ti Batac.
Segun ken ni Alones, ti inaramid da ket paset ti programa da a “Feed the Family of PDL”.
Inlawlawag na a nakigtot ngem naragsakan ti pamilya ti saannan nga innaganan a balud iti panagturong da iti pagtaengan da bitbit da dagiti makan a nagsasangwan da.
Kuna ni Alones nga iti panangbisita da ti pamilya ti balud ket ditoy metten nga inpakaammo da ti kasasaad ti maseknan iti uneg ti pagbaludan.
Inpasigurado ni Alones nga awan ti problema ti balud ken uray ti pamilya na.
Inbatad ni Alones a kadwa da met laeng dagiti dadduma a balud a nagpili no siasinno iti masopresa ti pamilya na.
Maipalagip nga agpapan ita ket saan paylaeng a mabalin nga agawat ti bisita dagiti balud gapu iti mapaspasaran a pandemya a gubuay ti covid-19 pandemic.
