LAOAG CITY – Nagtalinaed ti napintek a tarigagay ni Gob. Matthew Marcos Manotoc a makikammayet kadagiti nagdumaduma nga ahensia ti gobierno tapno maipasigurado a maipaay kadagiti umili ti maiyannatup a suporta.
Daytoy ti inpatalged ni Mr. Gervy James Gumarit, mangidadaulo ti Communications and Media Office ti Provincial Government of Ilocos Norte.
Inpalgakna nga iti laeng nabiit, nagturong manen ti gobernador iti opisina ni Secretary Rex Gatchalian ti Department of Social Welfare and Development (DSWD) Central Office.
Segun kenkuana, napagsaritaan ti sekretario ken ni Gob. Marcos Manotoc dagiti suporta a maipaay kadagiti umili a naapektaran kadagiti napalabas a kalamidad a napasaran ditoy probinsia.
Mainaig iti daytoy, kinuna ni Gumarit, nga inpasigurado ni Secretary Gatchalian ti pannakaipaay ti naan-anay a suporta ditoy probinsia babaen kadagiti nagdumaduma a programa ti Department of Social Welfare and Development kas iti Assistance to Individuals in Crisis Situations (AICS), Cash for Work (CFW) ken ti pannakaipaay ti kanayonan a food packs.
Naammoan a malaksid iti Department of Social Welfare and Development ket dandanonen ti gobernador dagiti dadduma pay nga ahensia ti gobierno kas iti Department of Agriculture, Department of Transportation, Department of Health ken dadduma nga ahensia ti gobierno.
