LAOAG CITY – Positibo ti Provincial Government of Ilocos Norte iti pagresultaan ti maisaysayangkat a negosasion kadagiti mabigbig a negosiante ti pagilian a Thailand.
Inlawlawag ni Bise Gobernador Cecilia Araneta Marcos a naisayangkat ti pakpakauna a negosasyon kadagiti nadakamat a negosiante iti panangikuyog ni Thai Ambassador Tull Traisorat kadakuada iti iyuumayna ditoy probinsia.
Inbatadna a karaman ditoy dagiti agtagikua iti Plus Express, PTT Global Chemical Public Company Limited ken ti “shrimp culture”.
Mangnamnama ti bise gobernador nga adda ti napintas a pagdur-asan dagiti maisaysayangkat a negosasyon.
Nupay kasta, inpalgakna nga adda ti sabali pay a pannakitaripnong kadakauada ti Invest Office idiay Manila iti masungad nga Agosto 22.
Kunana nga adda ti pannigurado ti ambassador ti Thailand a malaksid kadagiti immay a negosiante ditoy probinsia ket adda dagiti nayun a negosiante manipud Thailand a makipaset iti investment conference nga isayangkat ti Invest Office idiay Ascott, Bonifacio Global City, Taguig.
Mainaig iti daytoy, kuna ti bise gobernador nga addan ti sangay dagiti nadakamat a kompania manipud Thailand iti dadduma a paset ti pagilian ken manamnama ti panangipasdekda ti sangayda ditoy probinsia.
Innayonna a malaksid kadagiti immun-unan a nadakamatna a kompania ket adda pay dagiti interesado a hotel kangrunaanna iti Hop Inn.
