LAOAG CITY – Nakasaganan ti Philippine Olympic Committee (POC) no mano nga atleta ti mabalinda nga ipatulod iti Southeast Asian (SEA) Games inton sumaruno a tawen idiay Thailand.
Segun ken ni Philippine Olympic Committee President Abraham “Bambol” Tolentino, gagemda a mangipatulod kadagiti atleta iti agarup amin a klase ti sports events.
Dakkel nga inspirasion iti panangipatulod ti ad-adu a bilang ti balligi ti Pilipinas iti Paris Olympics no sadinno nakagun-od ti uppat a medalya iti panangidaulo ni Carlos Yulo a nakaiyawid ti dua a balitok a medalya.
Nalawa pay ti oras dagiti atleta iti panagsaganada iti nasao a torneo gapu iti nabatbati nga agarup maysa a tawen tapno magun-od ti panagbalin nga overall champion.
Idi 2019 ket nagbalin a kampeon ti Pilipinas idi napili kas host ken iti 2022 edition idiay Vietnam ket nagbalin a maikapat idinto nga idi 2023 idiay Cambodia ket adda iti maikalima a puesto ti Pilipinas.
