LAOAG CITY – Nakaiyawid ti lima a balitok a medalya dagiti weightlifters ti pagilian iti naisayangkat nga International Weightlifting Federation (IWF) Youth and Junior World Championships idiay Lima, Peru.
Indauloan ni Jay-R Colonia ti Zamboanga City a nangibulsa ti dua a balitok a medalya iti clean and jerk and total ken maysa a silver medal iti snatch ti Youth men’s 49 kilogram category.
Inbatad ni Colonia a saanna a ninamnama a magun-odna daytoy iti balitok a medalya gapu ta daytoy ti umuna a gundaway a simmabak isuna iti international competition.
Kaduana a nakaala ti balitok a medalya ni Alexsandra Ann Diaz manipud idiay Zamboanga City a nangabak iti Youth women’s 45 kg. snatch and total ken maikatlo iti clean and jerk pakairamanan dagiti dadduma pay a nakaiyawid ti medalya para iti pagilian.
