LAOAG CITY – Inbatad ni Barangay Chairman Juan Karlos Tabios iti Barangay Sta. Rosa ditoy ciudad ti Laoag a nakasarita nan ti agtagikua iti Pickle Farm mainaig iti reklamo a naidanu iti Bombo Radyo Laoag.
Daytoy ket mainaig iti maipagarop a kinaringgor dagiti mapan agay-ayam iti lugar a pakaistorboan dagiti residente aglalo iti panagturog da ti rabii.
Segun iti kapitan, iti panagsarita da iti akinbagi iti Pickle farm ket naibaga na a dandanin malpas ti pannakapaserra ti pagay-ayaman ti pickle ball.
Inlawlawag na a no maserraan ti lugar ket saan ton a makaparnuay ti ringgor a mabalin a pakaistorboan dagiti residente iti nadakamat a barangay.
Innayon na a ti nasao a Pickle farm ket addaan ti permit ken saanda met a mabalin a surwan iti oras a mabalin na laeng a panagoperar.
