LAOAG CITY – Inpasingked ni Department of National Defense Secretary Gilberto Teodoro nga itultuloy ti Pilipinas ti mangilaban ti karbengan ti pagilyan iti West Philippine Sea.
Daytoy ket iti baet ti panangirakurak ni Pres. Ferdinand Marcos Jr. a ti pagayam amin ti Pilipinas dagiti nagduduma a pagilyan.
Inpalgak ni Teodoro nga uray pagayam ti Pilipinas ti maysa a pagilyan ket rebbeng nga ireklamo no adda ti pakabasolan na iti bukod a pagilyan.
Innayon na a ti verbal note a naipatulod iti China manipod iti Pilipinas babaen kenni Pres. Marcos ket arigna maysa a darum iti international Law.
Nupay kasta, inlawlawag ti opisyal nga awan ti makuna a darum iti international Law no di ket babaen ti verbal note ket maiwaragawag ti Pilipinas ti nagbasolan ti China iti pagilyan.
Segun kenkuana, masapol a patibkeren ti diplomasya a maipatungpal iti Exclusive Economic Zone (EEZ).
Mainaig iti daytoy, inpasigurado ni Secretary Teodoro nga adda ti istratehiya nga ar-aramiden ti gobierno national seknan iti problema iti West Philippine Sea kagiddan ti panagapela na iti publiko a makikooperar ken agtalek iti gobierno.
Immun-ina iti daytoy, inatake ti Chinese Coast Guards dagiti kameng ti Philippine Coast Guard babaen ti water cannon bayat ti papanda panagikabil ti supply a makan iti Sierra Madre.
